Вайна ў Афганістане ішла амаль 10 гадоў. Увесь  гэты перыяд і даволі працяглы час пасля вываду савецкіх войск пра баявыя дзеянні ў далёкай і чужой краіне многа не гаварылі, бо абмежаваны кантынгент савецкіх войск у Афганістане панёс вялікія страты: толькі па афіцыйных даных, яны склалі 15 тысяч ваеннаслужачых.

У баявых дзеяннях на зямлі Афгана ў розныя гады прымалі ўдзел і 32 тысячы беларусаў. 771 з іх загінуў. Такое з памяці не выкрасліш.

Савецкія войскі з Афганістана поўнасцю былі выведзены 15 лютага 1989 года. Менавіта гэты дзень ужо некалькі дзесяцігоддзяў адзначаецца як Дзень памяці воінаў-інтэрнацыяналістаў. Урачыстыя мерапрыемствы, прысвечаныя гэтай даце, прайшлі па ўсёй краіне. У Паставах па традыцыі яны пачынаюцца з урачыстага мітынгу каля помніка воінам-землякам, якія загінулі пры выкананні свайго інтэрнацыянальнага абавязку, устаноўленага ў 2006 годзе ў скверы па вуліцы Гагарына. На ім прысутнічалі воіны-“афганцы”, а таксама тыя, хто праходзіў службу ў Егіпце і іншых “гарачых” кропках, іх родныя і блізкія, прадстаўнікі раённай улады, ваеннага камісарыята, грамадскасці, вайскоўцы, моладзь.

Адкрыў мітынг камандзір Асобнага авіяцыйнага атрада, воін-інтэрнацыяналіст, баявы лётчык палкоўнік Станіслаў Ігнацьевіч Раманчук. Ён адзначыў, што ў гэты дзень мы аддаём даніну памяці тым, хто загінуў на афганскай зямлі. Аналізуючы тыя падзеі, мы бачым, што сёння неаб’яўленая вайна ў Афганістане перарасла ў братазабойчую, якой няма канца. І вастрыня тых праблем, якія існавалі ў гэтым рэгіёне, па-ранейшаму існуе. Мы бачым і тое, што ні рыначныя адносіны, ні дэмакратыю нельга прынесці ў іншую краіну, іншаму народу на штыках, на танках. А менавіта з такой мэтай у апошні час развязваюцца ваенныя канфлікты. У выніку палае ўвесь Блізкі Усход, ідуць баявыя дзеянні ў многіх афрыканскіх краінах. І мы гаворым усім войнам рашучае “Не!” Сёння наша задача ў тым, каб захаваць памяць пра загінулых на той вайне, весці патрыятычнае выхаванне сярод моладзі. А для гэтага воінам-“афганцам” трэба па-ранейшаму быць у страі…

Да помніка былі ўскладзены вянкі і кветкі. Прагучаў салют.

Працягам урачыстых мерапрыемстваў стаў тэматычны вечар “Юнацтва, абпаленае вайной” у Доме культуры па вуліцы Станкевіча. Ён стаў данінай памяці і павагі ўсім тым, хто меў дачыненне да гераічнай і трагічнай вайны ў Афганістане. Хвілінай маўчання ўшанавалі памяць тых, хто загінуў на чужой зямлі, выконваючы свой воінскі абавязак.

Да прысутных звярнуўся старшыня раённага выканаўчага камітэта Віктар Сяргеевіч Гутараў, які ў сваім выступленні адзначыў, што ўжо вырасла цэлае пакаленне, для якога вайна ў Афганістане — далёкая гісторыя, але для саміх “афганцаў” гэты перыяд звязаны з непасрэдным выкананнем свайго воінскага абавязку. Вайна нанесла нам балючыя раны. У Афганістане загінулі і нашы землякі-пастаўчане Аляксандр Урбель, Міхаіл Лапко, Радзівон Мішута, у Сірыі — Сяргей Галяк. Мы ўшаноўваем іх памяць і ганарымся імі. Ганарымся і тым, што многія воіны-інтэрнацыяналісты маюць высокія баявыя ўзнагароды. Ордэнам Чырвонай Зоркі ўзнагароджаны А. В. Голад і А. М. Кулакоў. Шмат “афганцаў” адзначана медалямі “За адвагу”. Сёння ў Рэспублі­цы Беларусь робіцца ўсё, каб грама­дзяне нашай краіны не траплялі ў “гарачыя” кропкі, каб ім не давялося служыць па-за межамі сваёй краіны. Іншых падыходаў да гэтага пытання няма. Наша армія абараняе ў першую чаргу паветраныя і наземныя межы сваёй краіны, заходнюю граніцу Садружнасці Незалежных Дзяржаў. На заканчэнне старшыня райвыканкама выказаў шчырую ўдзячнасць усім ветэранам вайны ў Афга­ністане за праяўленую мужнасць і вялікую цяперашнюю работу па патрыятычным выхаванні моладзі, пажадаў ім і іх родным моцнага здароўя, шчасця, упэўненасці ў заўтрашнім дні.

— Дай бог, каб нашы наступныя сустрэчы зноў прайшлі ў такім жа складзе, — сказаў у сваім выступленні старшыня раённай арганізацыі грамадскага аб’яднання “Беларускі саюз ветэранаў вайны ў Афганістане” Валерый Антонавіч Лушчык. — Людзі, якія ў мірны час апынуліся ў пекле вайны за межамі Радзімы, заслужылі павагу, гонар, падтрымку. А галоўнае — яны захавалі дух салідарнасці і ўзаемавыручкі, застаюцца моцнымі ў жыцці, вучаць моладзь стойкасці, мужнасці і адданасці сваёй справе. Арганізацыя грамадскага аб’яднання “Беларускі саюз ветэранаў вайны ў Афганістане” пры падтрымцы раённай улады будзе прымаць усе меры, накіраваныя на рэабілітацыю воінаў-інтэрнацыяналістаў, вырашэнне іх паўсядзённых праблем, а таксама прадоўжыць работу па патрыятычным выхаванні моладзі.

На завяршэнне мерапрыемства свае творчыя віншаванні воінам-“афганцам” падарыў народны вакальна-інструментальны ансамбль “Скіфы”.

Сяргей ДЗЕРАВЯНКА.

В Поставах почтили память погибших афганцев